قبل ما تدور على شغفك، طبق الخطوات دى!
خطوات عملية تساعدك انك تلاقى شغفك.
قبل ما نتكلم عن الشغف وحلاوته وسحره، خلينا الاول نطبق بعض الخطوات العملية اللى من خلالها هتقدر تجاوب على الاسئلة وتوصل لشغفك.
معنى كلمة passion؟
مبدئيا الشغف مكانه القلب ، فلازم ترجع تعيد الارتباط ما بين قلبك تانى مش يكون عقلك بس المتحكم ، اعمل توصيل مع قلبك عشان تعرف تسمعه و يوجهك و دى بدايه اى قصة شخص ناجح وهى انه مشى ورا قلبه.
بس خلينى اسالك سؤال وتجاوب بصراحه.
" هل انت مرتبط اكتر بقلبك ولا بعقلك فى الوقت الحالى ؟ "
الصوره دى للاسف بتعبر عن حال ناس كتير اوى مننا , قلبنا كان مسيطر جدا واحنا صغيرين وكل ما بنكبر العقل بياخد مكان القلب لحد ما القلب بيختفى اصلا!
بس خلينا ناخد آيه من كلام ربنا عز وجل فى القرآن الكريم
" أَفَلَمْ يَسِيرُوا فِي الْأَرْضِ فَتَكُونَ لَهُمْ قُلُوبٌ يَعْقِلُونَ بِهَا "فكر فى الايه دى شويه وعيد حساباتك تانى.
و ده هياخدنا لاول خطوه و هى:
1/ اقرا قصص نجاح كتير هتلهمك
و هتشوف الناس بظروف اصعب منك و نجحو ازاى و هتطلع بمليون فكره، فى أيه فى القرآن
" و كلا نقص عليك من انباء الرسل ما نثبت به فؤادك "
طب ليه مهم نقرا قصص نجاح كتير ؟
لان الواقع بره اغلبه سلبى ومحبط جدا وغالبا هيتريقو عليك، وهنا هيجى دور قصص النجاح هتلاقى ناس فى نفس ظروفك ويمكن اصعب ونجحو لما هتقرا القصص دى قلبك هيطمن وهتتعلم منهم كتير.
ودى قصص نجاح لشباب قدرت تنجح رغم صعوبة الظروف:
2/ هات ورقه و قلم و اعمل " happiness list " قائمة السعادة بتاعتك
وتكتب فيها كل الحاجات اللى بتفرحك حتى لو اكله بتحبها او مثلا لو لقيت ربع جنيه ف جيبك فى وقت الاجرة فيه جنية وربع لما تكون مدايق اختار حاجة من القائمة دى واعملها و هتعرف ان مفتاح سعادتك فى معاك. افتكر ديما ان الهدف من كل الخطوات دى ان قلبك يصحى تانى.
3/ هات نوت بوك وسميه "the gratitude journal" قائمة الشكر
و اكتب فيها كل يوم قبل ما تنام اى حاجه حلوه حصلتلك النهارده او نعمه بتشكر ربنا عليها، كده بتدرب عينك انها تشوف نعم ربنا عليك " لئن شكرتم لأزيدنكم" و اكيد عندك بدل النعمة مليون نعمة بس انت دور ..
4/ التجربة
على راى احمد مكى لما قال " مش يمكن لما اجرب اطلع بعرف " هتعرف نفسك وامكانياتك بالتجربه مش من مقاله او كتاب او غيره .. جرب ثم جرب ثم جرب.
5/ انت تقدر عشان انت " رائد "
اللى بيحلم ويسعى لحلمة ويتبع قلبه وشغفه هو شخص بيمشى تحت ضوء القمر، فى الضلمة وكل الناس نايمة هو الوحيد اللى شايف الفجر و النور، عشان كده هتقابل ديما انتقاد مش عشان انت غلط، لا عشان انت شايف حلم هما مش هيشوفة لانك بتعمل حاجة مختلفة عنهم وسبقتهم وبتشق طريقك وشايف علامات الفجر، لازم تستحمل الضلمة والعقبات ومتخفش ابدا طول ما انت بتسعى وبتجتهد
" اللى هيبطل يحلم، هيبطل يعيش "
اخيرا بقى حط نفسك مع ناس عندها شغف لانهم هيساعدوك جدا بدل المجتمع المحبط اللى عايش فيه ، الناس دى هتكون عزوه و ضهر ليك دول هتلاقيهم فى عيله نادى القراءه العمليه.
طبق الخطوات دى عشان تعرف تجاوب على الاسئله فى المقالة دى :
"إسمع لصوت قلبك"
