قصة مايكل يوسف - من دبلوم فندقى إلى رائد فى اللغة الانجليزية
مايكل يوسف شاب مصرى كرس حياته لتعليم اللغة الانجليزية للوطن العربى كله مجانا.
وعدناكم اننا هنعمل "حوارات و مقابلات" مع شباب ناجحة فى مصر عشان ننشر الأمل لكل شاب مصرى انه يسعى ويطور من نفسه ويسيب اثر فى الدنيا.
وقصتنا النهاردة مع شاب مصرى عظيم، اسمه " مايكل يوسف "، عملنا معاه حوار شيق وممتع جدا وسألناه الاسئلة دى :
مايكل يوسف بدأ ازاى و نقاط التحول فى حياته ؟ والتحديات اللى قابلته خلال رحلته؟
بدأ حياته فى دبلوم فندقى و اشتغل شغل كتير مؤقت زى انه يكون جرسون، وكان عايش بلا هدف ويعانى من كل حاجه حتى اقرب الناس ليه ونظرة المجتمع لكونه شخص بيدرس فى دبلوم مش تعليم عالى!
وهنا كانت نقطة التحول الأولى فى حياته، انه قرر يطور من نفسه ويغير نظرة الناس له، و بدأ فى كلية تجارة بس محبهاش وملقاش نفسه فيها، بعد كده قرر انه يشتغل مبرمج وفى الوقت ده " 2001 " تعليم البرمجة كانت مقتصرة على المهندسين وهو كان معاه دبلوم، وهنا قابل تريقة كتيير جدا سواء من أهله او من الطلبة اللى كان بيدرس معاهم.
بس هنا قابلته عقبة جديدة وهى " الانجليزى " اتصدم لما بدا يدرس برمجة ان كل الكتب بالإنجليزية، وكان مستواه فى الانجليزى وقتها ضعيف جدا جدا، و هنا كانت نقطة التحول التانية فى حياته و التحدي الجديد اللى تحداه لنفسه وهو انه هيطور من نفسه فى الانجليزى والبرمجة مهما كان الثمن . وبدأ يشتري كتب برمجة كتير بالانجليزي , وبدأ يذاكر انجليزى اكتر من البرمجة عشان يطور من نفسة فى الانجليزى وقتها مكنش باصص لاى تريقة بيسمعها ومركز مع نفسه وحلمه وبس ومكنش بيخرج من بيته من كتر المذاكرة لأن حلمه مكنش بيخليه يضيع وقت وكان صادق مع نفسه.
وبعد سنة ونصف بدأ يتجلى عليه شخص جديد تماما، بقى شاطر فى الانجليزى والبرمجة و بدا يشتغل ويجيب فلوس من الحاجة اللى بيحبها , وهنا كان وقت نقطة تحول جديدة تماما فى حياته، فى 2003 بعت مقال لموقع https://www.devarticles.com
و المقال كان بيتكلم عن البرمجة و قرا المقال ده اكتر من مليون شخص , وده اللى خلى صاحب الموقع بنفسة يكلم " مايكل يوسف " ويعرض علية انه يكتب مقالات فى الموقع مقابل 100 دولار للمقال الواحد !
وهنا قرر مايكل يوسف أنه يتعلم اكتر وياخد 9 شهادات معتمدة من مايكروسوفت فى البرمجة . لحد سنة 2008 وحصل ابتلاء لمايكل يوسف وهو مرض خطير صرف عليه فلوسه كلها تقريبا عشان يتعالج منه و قرا اكتر من 100 كتاب عن الصحة والامراض والابتلاء ده وطريقة تعامل مايكل معاه حولة لميزة ونقطة قوه لانه لما قرأ كتب كتير بقى شاطر جدا فى مجال الترجمة الطبية
بجانب دراسته فى كلية اداب ترجمة جامعة القاهرة فى 2006 لحد 2010 وهنا بدأ مايكل رحلة جديدة فى مجال الترجمة و الانجليزى.
وهنا اخذ عهد على نفسه أنه يساعد كل الناس انها تتعلم انجليزى وتطور من نفسها وتتحدى الظروف مهما كانت .
ايه الدروس اللى اتعلمتها خلال رحلتك ؟
لخص مايكل يوسف الدروس اللى اتعلمها فى 3 دروس فقط !
- لو اجتهدت بتلاقى
- العلم هو البداية و الطريق الصح للنجاح
- الانجليزى هيوصلك لحاجات كتيير جدا
مفهوم النجاح عندك ايه ؟
النجاح تعريفه هو نسبي من شخص للتانى والنجاح بالنسبة لمايكل يوسف لخصة فى جملة واحدة فقط
" النجاح انك تشتغل فى مجال تحبه وتكون مبسوط فيه وتروح بيتك آخر اليوم راضى ومبسوط "
وده اللى بنحاول نقوله لكل شاب فى مصر من خلال نادى القراءة العملية، انك لما تطور من نفسك وتشوف نقاط القوة عندك وتتميز بيها وتعيش بشغف , وتتعلم وتجتهد وتزود قيمتك فى مجالك اللى اختارته بعيدا عن التنسيق وعن رغبة اهلك هتلاقى بدل الشغل والفرصة مليون فرصة .
لو تايهه وعايز تعرف شغفك ونفسك اقرا المقالات دى وخد الكورس ده : رابط الكورس
ايه رسالتك والأثر اللى نفسك تسيبه فى الدنيا ؟
رسالة مايكل يوسف والاثر اللى نفسة يسيبه فى الدنيا هو انه يخلي كل الناس تتعلم وتتكلم انجليزى كويس لانه مؤمن أن الانجليزى عامل مهم جدا جدا فى الوقت الحاضر و المستقبل وهو بيحاول يخدم الرسالة عن طريق انه عمل منهج وخطط للمذاكرة عشان تتعلم انجليزى لوحدك من غير كورسات . عمل خطة فى 2014 بس كانت صعبه شوية وبتاخد حوالى سنه , بس اغلب الناس طلبوا منه خطة ومنهج اسهل لحد ما قدر انه يعمل خطة اسهل للمبتدئين فى 2016 بتاخد 6 شهور بس واسهل وامتع بكتير من الخطة الاولى
واستفاد من المنهج ده اكتر من 100 ألف شخص فى الوطن العربى كله و تمت مشاركة الخطط والمناهج الخاصة بمايكل يوسف اكثر من 18 الف مره على الفيس بوك .
للحصول على الخطة الخاصة ب تعلم الانجليزية للمبتدئين : اضغط هنا
للحصول على خطة المستوى المتوسط : اضغط هنا
نصائح مايكل يوسف للشباب !
متصدقش اى حاجه تسمعها .
اوعى تمشى ورا المظاهر لان المظاهر خداعة جدا .
اتعلم انجليزى مهما كان السبب .
اجتهد واسعى واتعلم وهتلاقى نتيجة سعيك واجتهادك وهتفرض شروطك على الحياه .
العلم ثم العلم ثم العلم لازم تتعلم كل يوم حتى لو معلومة واحدة .
ودى كانت مقابلتنا مع أ/ مايكل يوسف اللى الهمتنا جدا قصته وكفاحه و اجتهاده وسعيه أنه يعلم اكبر عدد من الناس انهم يتعلموا انجليزى ويطورا من نفسهم يشتغلوا فى مجالات بيحبوها .
تحب الحوار الجاى يكون مع مين من الشخصيات الناجحة؟
